من أروقة محكمة الأسرة.. ابن عمها يقذفها بـ “مية نار” لرفضها ارتداء النقاب

قضايا الطلاق للضرر

“دلق على وشي مية نار عشان رفضت ألبس النقاب”، بعين باكية وصوت حزين بدأت “الزوجة س.خ” حديثها لـ”بوابة القاهرة” وقالت: ” أجبروني على الزواج من ابن عمي قبل عامين، دمروا مستقبلي كنت عايزة أكمل الماجستير بتاعي وأخد الدكتوراة. لكن كل الأحلام دي اتدمرت ومستقلي ضاع واتشوهت”، ومن أروقة محكمة الأسرة عن قضايا الطلاق للضرر نسرد الواقعة.

واستكلمت الزوجة حديثها “زمان علمونا أن التدين مش في الشكل ولا اللبس”. وعن بداية معرفتها بزوجها تابعت “ده أصلا ابن عمي ومش متعلم خالص، ولما رفضت وقلت لوالدي أزاي أنا بحضر ماجستير وأتزوج واحد مش متعلم، قال لي: ده مش واحد ده ابن عمك وهيحافظ عليكِ، ومش هنصغر نفسنا قدام أخويا الكبير”.

إقرأ أيضا| ضغط الأهل على البنت في الزواج

وتابعت” وافقت تحت ضغط أبويا، وطلبت منه يعاملني معاملة الإسلام. فكان كل فهمه عن الإسلام طاعة الزوجة للزوج. أنه يستمتع بيها ويعاشرها في أي وقت بالنهار أو بالليل، دون أي حقوق للزوجة.

ولما كنت بقوله الدين مش كده. يرد عليا ويقول لي “هو أنتِ عشان اتعلمتي كلمتين هتكبري عليا، الراجل يعمل اللي هو عايزه”.

الزواج عن حب أم جواز الصالونات.. تعرف على الإجابة

الزوجة: قطع كتب الماجستير بتاعي لما قلتله يوم ورايا شغل عايزه أكتبه

وعن طبيعة عمله قالت الزوجة: “فاتح ورشة ميكانيكي، وكان بيرجع في أي وقت البيت، يطلب مني اسيب اللي في أيدي وأقعد معاه، وقطع كتب الماجستير بتاعي لما قولتله يوم ورايا شغل عايزه أكتبه، قال لي الست تسيب اللي في أيدها وتقعد مع جوزها”.

وأضافت “كل حاجه عنده يقول لي الست لازم تطيع جوزها، وطبعا بقى يضربني على أتفه الأسباب، مشيت من البيت وروحت قعدت عند أختي، وكلمت بابا قال لي أرجعي بيت جوزك، جالي عند أختي فتحتله الباب، دخل قال لي قومي روحي معايا والبسي النقاب، قلتله لأ، أنا مش هلبس النقاب وعايزه أتطلق وهكمل الماجستير بتاعي، راح مطلع مية النار وحدفني بيها على وشي”.

واستكملت “بعد ما شاهدني أتألم، منع أختي من أسعافي، ولولا تدخل زوج أختي لكان قتلني، وحررت محضر بقسم أول أكتوبر، ورفعت دعوى الطلاق أمام محكمة الأسرة بأكتوبر حملت رقم 3546 لسنة2017”.

نصائح للمقبلين على الزواج للبنات والرجال.. تعرف عليها

محام: الزوج حاليا هارب بعد تحرير زوجته المحضر

وعن تفاصيل القضية قال “إسلام حنفي” المحامي، المحكمة ستحكم بالطلاق من أول جلسة ووثقنا الإعتداء على الزوجة بمحضر الشرطة لإثبات الحالة وأرفقنا المحضر بمستندات القضية.

وأضاف في تصريحات خاصة لـ”بوابة القاهرة” الزوج حاليا هارب بعد تحرير زوجته المحضر، وهناك أمر من النيابة العامة بضبطه وإحضاره.

تعرفي على خدمات| مكتب المساعدة القانونية

استشارية أسرية: التكافؤ شرط مهم في الزواج

وقالت هبة عز الدين، استشارية أسرية، أن التكافؤ شرط مهم في الزواج، فلا يمكن أن تتزوج سيدة متعلمة من رجل غير متعلم وينجح الزواج، مبينة أن الفوارق في التفكير والاهتمامات ستدمر الحب لو كان الزواج قائماً على حب أصلا.

ما هو الحب الحقيقي؟.. تعرف على الإجابة

وتابعت في تصريحات خاصة لـ “بوابة القاهرة”، لابد للأهل ألا يجبروا الفتاة على الزواج من قريب لهم، لابد أن يكون هناك فكر متقارب بين الزوجين حتى تنجح العلاقة الزوجية.

كتبه| داليا فكري